Er du engasjert i språk, redaksjonelt arbeid og presseetikk?

Er du glad i språk, nysgjerrig på redaksjonelt arbeid eller oppteken av god presseetikk? Kanskje til og med alle tre? Bli med i desken, då!

Desken er ein seksjon i Studentmedia i Trondheim (SM). Me samarbeider med både Radio Revolt og Under Dusken Video, men kanskje aller mest studentavisa Under Dusken.

Ein deskar har vakt éin til to gonger i veka, og dette er hovuddelen av arbeidet. Hovudoppgåva på vakta er det me kallar desking. Ein journalist kjem då med ei sak som er meir eller mindre ferdig skriven, og oppgåva til deskaren er å samarbeida med journalisten om å gjera saka endå betre, både med tanke på språk, struktur og presseetikk, slik at ho blir klar for publisering.

I løpet av vakta tek du deg òg av nettpublisering, oppfølging av tips og iblant skriving av korte, aktuelle saker. Her får ein med andre ord mykje nyttig erfaring som ein kan få bruk for seinare i livet!

I tillegg til vanlege deskarar tek me opp éin deskar med særansvar for korrektur, altså ein korrektursjef. Hovudoppgåva til korrektursjef er å sjå til at alle sakene til magasinet Under Dusken blir korrekturlesne samt å driva kontinuerleg arbeid for den språklege kvaliteten i Studentmediene i Trondheim. Merk at korrektursjef ikkje treng å lesa all korrekturen sjølv (med mindre hen vil det); det er heilt mogleg å få med seg nokre andre frå gjengen til arbeidet.

Desken er ein nokså liten seksjon, noko som legg til rette for eit godt sosialt miljø. Me har god kultur for å støtta kvarandre i arbeidet, så du skal kjenna deg trygg på at du får god og grundig opplæring! Me er ein gjeng menneske med ulike styrkar, så du treng ikkje skriva plettfri norsk (verken nynorsk eller bokmål) eller ha journalistbakgrunn for å vera med, berre engasjement og interesse for å læra meir.

I søknaden kan du godt skriva litt om motivasjonen din til å søka nettopp deskar-vervet, og spesifiser gjerne om du allereie no veit at du kunne tenkja deg korrektursjef-vervet eller ei.

Bindingstida er på to år, og om du har spørsmål om verva, kan du kontakta leiar av desken på desksjef@studentmediene.no

Kun norsktalende søkere